Бүгін, 20 наурызда мектебімізде барша қазақ елінің ұлық мерекесі Наурыз мейрамы салтанатты түрде аталып өтілді. Мерекенің басты ұраны «Ұлы күні Ұлыстың, басы болсын ырыстың!» деген сөздермен өрнектелді. Әр жылда дәстүрлі түрде ұйымдастырылатын бұл шара биыл да ерекше мектеп алаңында тойланды. Наурыз мейрамына ұстаздар, оқушылар және ата-аналар бірлесе атсалысып, елдің тарихы мен салт-дәстүрін еске алып, көптен күткен қуанышқа толы күнге айналдырды.
Мереке әдемі әрі сәнді рәсімдермен жалғасты. Осы күні ерекше сыйлы қонақ – Қызыр баба атамыз болды. Ол батасын беріп, қазақ халқының ежелгі ғұрыптарын, дәстүрлерін жандандырудың маңыздылығын атап өтті. Ал, ақ әжелеріміз дәстүрлі Жарапазан айтып, көктемнің жарқын да жақсылыққа толы болуын тіледі.
Мереке барысында өткізілген аластау рәсімі де көпшіліктің көңілін босатып, жамандық пен жаман көзден сақтануды мақсат еткен ерекше дәстүр болды. Әжелеріміз шашу шашып, ауылдың жақсылығына, берекесіне тілектестігін білдірді. Барлық қонақтарға дәстүрлі палау, ыстық бауырсақтар, Наурыз көже мен 7 шелпек таратылып, қонақтарды дәмнен құр қалдырған жоқпыз.
Екінші бөлімде мектеп ауласында «Ұлттық ойындар» ұйымдастырылып, балалар мен ата-аналар ерекше қызығушылық танытты. Арқан тартыс, қол күрес, бөренеге шығу, жілік жару, асық ату және ләңгі тебу сынды ұлттық ойындар әдемі әрі тартымды болды. Қыздар мен аналар да өзара қызықты ойындар өткізіп, күлкі мен көңіл-күйдің көтеріңкі болуына үлес қосты.
Бұл мереке мектеп ұжымының және ата-аналар қауымының ынтымақтастығын көрсетіп, ұлттың дәстүрлерін жаңғыртудағы маңыздылығын тағы бір мәрте дәлелдеді. Көңілді әрі мазмұнды өткен Наурыз мейрамы баршаға қуаныш пен береке сыйлады.
Алдағы уақытта да осындай игі шаралар жалғасын тауып, ұрпақтарымыз қазақ халқының құндылықтарын қастерлей отырып, жаңа дәстүрлерді қалыптастыра беретініне сеніміміз мол. Ұлыстың ұлы күні баршаңызға бақ-береке әкелсін!
#nauryznama2025
https://www.instagram.com/p/DHbluKcS7Zu/
