"Ауған соғысы: өткенге тағзым, бүгінге тағылым".
2025 жылдың 13 ақпан күні мектебімізде 8-10 сынып оқушыларының қатысуымен "Ауған соғысы: өткенге тағзым, бүгінге тағылым" атты кездесу кеші өтті. Бұл шара жас ұрпаққа тарихтың маңызды беттерін таныстыру, елін қорғаған батырларымыздың ерлігіне құрмет көрсету мақсатында ұйымдастырылды.
Кездесуге Ауған соғысының ардагерлері Парманов Таспулат Парманович пен Ракишев Нұрлан Жамбулович қатысты. Олар – Солтүстік Қазақстан облысы Ауған соғысы және жергілікті соғыс ардагерлері одағының мүшелері. Ардагерлер оқушылармен өз өмір жолдары, соғыстағы қиындықтары мен жауынгерлік ерліктері туралы сыр шертісті.
Кеш барысында оқушылар ардагерлерге сұрақтар қойып, олардың басынан өткен оқиғалар жайлы білді. Қонақтар өздерінің жастық шағы, әскери борышын өтеу кезінде бастан кешкен қиындықтары туралы әсерлі әңгімелер айтып берді. Сонымен қатар, олар соғыстың бейбіт өмірге тигізген әсері, достық пен патриотизмнің маңызы жайлы ойларымен бөлісті.
Бұл кездесу оқушылардың тарихи санасын қалыптастыруға, батырлықтың, адалдықтың және ерліктің мәнін түсінуге ықпал етті. Іс-шара соңында оқушылар ардагерлерге алғыс айтып, естелік суретке түсті.
Осындай кездесулер жастардың отансүйгіштік рухын нығайтуға, тарихи оқиғалардан сабақ алуға мүмкіндік береді. Ауған соғысының ардагерлеріне көрсеткен ерліктері үшін алғысымыз шексіз!
